Кондак 10
Спасения во Христе неизследимую пучину и покаяния многую силу явил еси в себе, Петре, егда трикраты по предреченному отверглся еси Господа: не вем Человека сего! Егда клялся и ротился еси во дворе архиереа, но абие, воспомянув глагол Иисусов, вне текл еси, плачася горько. Мы же, умильне взирающе на пресветлый сей образ сокрушения, в научение и обличение жестоковыйных сердец наших дарованный, поем Господу, паки дивно возвеличившему тя: Аллилуиа.
Икос 10
Стена и оружие непобедимое был еси, Павле, противу миродержителей тьмы века сего, яко и царство их в Коринфе, Ефесе и инех градех вселенныя сокрушил еси, тьму многобожия разгоняя и разум истины утверждая. Ты бо неложно показался еси Божий слуга в терпении мнозе, в скорбех, бедах, в теснотах, в ранах, темницах, в нестроениих, трудех, во бдениих, в пощениих, яко и ум наш недоумеет изрещи богатство доброты твоея, деннонощныя подвиги со слезами многими. Того ради, зряще море любве твоея, дерзающе молим: услыши нас, убогих грешными усты глаголющих сицевая: Радуйся, умерый греху благовестниче непобедимый, яко в тебе первее ветхаго человека победив, Христу сораспялся еси; радуйся, учителю многоплодный и волков хищных обличителю, яко тобою образ верным показал еси, присно бодрствуя и научая вся сугубо: словом и житием по слову. Радуйся, всех обогатителю, яко, прежде сам обнищав и ничтоже имый, вся содержал еси; радуйся, о христианех пламенный ревнителю, обручивый я Христу, яко деву чисту непорочную невесту. Радуйся, утробе многоболезненная бывый о чадех твоих в муках рождения, дондеже вообразится в них Христос; радуйтеся, Павле и Петре, в Дусе единице согласная во едином граде верность Христу кровию запечатлевшии. Радуйтеся, святии первоверховнии апостоли Петре и Павле.
Кондак 11
Пети и ублажати узы и страдания твоя, Павле многострадальне, достойно есть, яко токмо в терпении мнозе, но и с радостию предреченный ти от Агава пророка узы восприял еси, и Церкви Кесарийстей свидетельствовал еси сице: не точию связан быти готов есмь за имя Господа Иисуса. Емуже и мы, дивному во святых Своих, поем песнь: Аллилуиа.
Икос 11
Светом радости неизреченныя и Божественныя любве осиян был еси, Петре, егда Господь по воскресении первее прочих апостол явися тебе, скорбевшему. По сих же паки явлься, Владыка жизни вопроси тя трикраты: Симоне Ионин, любиши ли Мя? Ты же, огнем Божественныя любве опаляем, отвещал еси тепле: Господи, Ты веси яко люблю Тя. Того ради и мы, обнищавшии духом, помянувше преизобильныя токи слез и любве твоея, ихже ради воззва тя Господь на прежний степень апостольства, благоговейне взываем ти сицевая: Радуйся, учителю покаяния, слезами горькими высоту смирения стяжавый и Воскресшим от гроба к радости неизглаголанней на веки приобщенный; радуйся, премудрости глубино, смиренномудрия высото, пламеню любве, образ жития всем верным себе явивый. Радуйся, друже Господа Иисуса, иго благовестия ревностно понесый, над наследием Божиим господствовати не восхотевый, но послушанию властем научивый; радуйся, апостоле Христов, мудрость змиину и чистоту голубину в себе сочетавый и образом смерти твоея на кресте крайнее смиренномудрие показавый. Радуйся, рабе Господа верный, умноживый данный тебе талант и в радость Господа вшедый; радуйтеся, Петре и Павле, сердца не тесная, весь мир любовию вместившая и концы вселенныя просветившая. Радуйтеся, святии первоверховнии апостоли Петре и Павле.
Кондак 12
Благодать Духа Утешителя, излиявшаяся на главы верных во образе языков огненных, скоро излияся изо уст твоих, Петре, глаголом огненным, во еже благовестити с силою многою Христа распята не точию погибшим овцам дому Израилева, но и язычестей неплодящей церкви, да плодоносит и сия Богови нетленный крин чистоты и покаяния. Испроси и нам, апостоле достоблаженне, милость Господа, творящаго тобою великая и чудная, рукою твоею мертвыя воскрешающа и смертию твоею на кресте мертвенную любовь нашу воспламеняюща, да непрестанно поем Ему: Аллилуиа.
Икос 12
Поюще пресветлую память твою, Павле, достойно ублажаем неизреченныя подвиги, болезни и труды, яже во бдениих, во алчбе и жажде, в пощениих, в зиме и наготе понесл еси. Кто бо изочтет раны, скорби и беды твоя во градех, в пустыни, в мори, беды от разбойник, беды от сродник, беды от язык и лжебратии? Кто подобен тебе? Паче всех апостол потрудился еси. Темже молим: не возгнушайся нас, грешных, молящихся тебе, но якоже всем был еси вся, и ныне услыши немощным гласом приносимая ти сицевая: Радуйся, узниче Христов, из темницы свет распространивый, словом и посланием во узах много потрудивыйся, зане воистинну слово Божие не вяжется; радуйся неизследимая пучино любве, по братии твоей отлучен быти от Христа приискренне восхотевый. Радуйся, подвижниче предивный, подвигом добрым подвизавыйся, течение совершивый и кровию твоею Церковь украсивый; радуйся, источаяй море чудес, яко главотяжи и убрусцы твои недуги исцеляху и демоны прогоняху. Радуйся, любве Божия неразлучный причастниче, Горняя мудрствуяй, а не земная, зане и от плоти разрешитися и со Христом быти возжелал еси; радуйтеся, Павле и Петре, веры христианския насадители, благочестия водами напоителие и ко пристанищу вечному вернии водителие. Радуйтеся, святии первоверховнии апостоли Петре и Павле.
Кондак 13
О всехвальнии благовестницы Петре и Павле! Внемлите воздыханием сердец наших, молящиеся за ны, много бо может молитва праведных пред Богом: потщитеся и ныне воспоминати нам о небеснем звании и христианстей кончине жизни нашея, привлецыте нас ко сладости евангельския истины, свяжите узами любве Христовы, да мы вси, отвергшеся нечестия и мирских похотей, внидем в радость Господа нашего, поюще Ему со Ангелы и с лики святых: Аллилуиа.
(Этот кондак читается трижды, затем икос 1 и кондак 1)
Молитвы первоверховному апостолу Петру
Молитва первая
О святый Петре, великий апостоле, самовидче и сотаинниче Божий, всемощною десницею Учителя твоего из вод волнующихся приятый и от конечнаго потопления свободивыйся! Не забуди и нас убогих (имена), в тине греховней погрязших и волнами житейскаго моря обуреваемых: подаждь нам твою руку крепкую, помози нам и удержи нас от потопления во страстех, похотех, лжах и клеветах. Сотвори и ты с нами милость, тебе от Господа явленную, да не в сомнении и маловерии изгибнем. Научи нас, учителю наш, проливати слезы покаяния, да плачем горько о деяниих наших в веце сем. И аще твоя слезы, в покаяние излиянныя, милостию Своею покры Господь и Учитель твой, испроси и нам, со дерзновением апостольским, прощения во гресе ежечаснаго. Да тихое и безмолвное житие поживем в веце сем до часа, в оньже имать призвати нас века Господь, наш Судия нелицеприятный. Ты же, о всехвальный апостоле, не отвержи вопля нашего и стенания к тебе, но заступи нас пред Христом, твоим Учителем, да непрестанно славим Его милосердие к нам, со Отцем и Святым Духом, во веки веков. Аминь.
Молитва вторая
О святый великий апостоле Петре! Не отвержи мя, раба твоего (имя) и стенания моего к тебе. Призри на мя, сущаго в болезнех и печалех, испроси у Христа, Учителя твоего, (содержание прошения), да непрестанно славим Его милосердие к нам, со Отцем и Святым Духом, во веки веков. Аминь.
Молитвы святым первоверховным апостолам Петру и Павлу
Молитва первая
О преславнии апостоли Петре и Павле, души за Христа предавшии и кровию вашею пажить Его удобрившии! Услышите чад ваших молитвы и воздыхания, сердцем сокрушенным ныне приносимыя. Се бо беззаконьми омрачихомся и того ради бедами, якоже тучами, обложихомся, елеа же добраго жития обнищахом зело и не возможем противитися волком хищным, иже расхищати наследие Божие дерзостно тщатся. О сильнии! Понесите немощи наша, не отлучайтеся духом от нас, да не разлучимся в конец от любве Божия, но крепким заступлением вашим нас защитите, да помилует Господь всех нас, молитв ваших ради, да истребит же рукописание безмерных грехов наших и да сподобит со всеми святыми блаженнаго Царствия и Брака Агнца Своего, Емуже честь и слава, и благодарение и поклонение, во веки веков. Аминь.
Молитва вторая
О святии апостоли Петре и Павле, не отлучайтеся духом от нас, грешных раб Божиих (имена), да не разлучимся вконец от любве Божия, но крепким заступлением вашим нас защитите, да помилует Господь всех нас молитв ваших ради, да истребит же рукописание безмерных грехов наших, и да сподобит со всеми святыми блаженнаго Царствия и брака Агнца Своего, Емуже честь и слава, и благодарение и поклонение во веки веков.
Молитва третья
О верховнии Апостоле: Петре, веры Христовой твердый изобразителю, и Павле, сладковещательная ластовица учения Господня! Зрим вас, аки многотекущую реку сказаний Христовых словес, истекающую от истинных недр Божиих и всю глубину кладезя истин богооткровенных пред нами, жаждущими их, открывающую. Зрим вас, аки светила, с небесе токи теплоты любве божественныя нам уясняющия: ублажаем вас, приемших труды и поты, во еже всеяти учений божественных семена: целуем стопы ваша, обтекавшия вся концы земли, и в трепете греховнем зрим главы ваша, смиренно преклоненныя к пречистым стопам Господним: единаго крестным путем (повешением) и другаго мечным усечением. Умильно просим вас, святии Апостоли, сотворите и нас в буести греховней преклоненными пред Учителем нашим Господом, сотворите гордости нашей главы усекновение учением богооткровенным: глад душевный наш да утолит Господь брашном, указуемым с самаго неба, якоже Петру: — ты же, Павле, богонасыщенный Христовых словес, потщися и нас до третьяго небесе возвести твоими непрестанными о нас ко Господу молитвами, да и мы тамо прославим с лики ангельскими и апостольскими дивнаго во святых своих Отца всяческих и Его же послал в мир спасаяй и наставляяй к жизни вечной, Господа Иисуса Христа, и единосущнаго Им Святаго Духа. Аминь.
Молитва четвертая
Святый верховный Апостоле Петре, каменю веры, на Христе, краеугольном камени, в Церковь исповеданием назданный! Моли, да и аз, умными помышлении и плотскими похотении всегда колеблемый, на тоемжде Христе, Камени живом, избранном, честном, верою наздан всегда совершаюся любовию в храм духовен, в священство свято, вознесити жертвы духовныя Богови Иисусу Христу. Святый верховный Апостоле Павле, сосуде избранный Христов, благодати и славы Божия преисполненне! Моли имущаго власть над тварию Творца, да мя, ныне сосуд погубленный, сотворит Себе сосуд в честь, освящен и благопотребен, на всякое благое уготован. Аминь.
Тропарь святым апостолам Петру и Павлу
Тропарь, глас 4
Апостолов первопрестольницы и вселенныя учителие, Владыку всех молите, мир вселенней даровати и душам нашим велию милость.
Кондак, глас 2
Твердыя и боговещанныя проповедатели, верх апостолов Твоих, Господи, приял еси в наслаждение благих Твоих и покой: болезни бо онех и смерть приял еси паче всякаго всеплодия, Едине сведый сердечная.
Величание
Величаем вас, Апостоли Христовы, весь мир ученьми своими просветившыя и вся концы ко Христу приведшия.
Тропарь апостолу Петру
(поклонение честным веригам апостола Петра)
Тропарь, глас 4
Рима не оставль, к нам пришел еси честными веригами, яже носил еси, апостолов первопрестольне. Имже верою покланяющеся, молимся: твоими к Богу молитвами даруй нам велию милость.
